Алматыда әлеуметтік осал топтарға коммуналдық қызмет тарифтерінің өсуін өтеу төлемдері 2025 жылдың 1 сәуіріне дейін ұзартылды.Алматы қаласы мәслихатының депутаттары әлеуметтік осал топтарға 0,8 АЕК мөлшерінде өтемақы төлеу туралы шешімді бірауыздан қабылдады. Бұл шешім бойынша, қаланың 9 әлеуметтік осал тобының өкілдері коммуналдық қызметтердің тарифі өскен жағдайда ай сайынғы өтемақыны 2025 жылдың 1 сәуіріне дейін ала алады.
2023 жылдың шілде айынан бастап Алматыда қала әкімідің тапсырмасымен «Тарифті инвестицияға айырбастау» бағдарламасы аясында 0,8 АЕК мөлшерінде ай сайынғы әлеуметтік көмек көрсетіліп келеді. Бұл көмек 140 мыңнан астам қала тұрғынына, оның ішінде Ұлы Отан соғысы ардагерлері, мүгедек балаларды тәрбиелеп отырған отбасылар, көпбалалы аналар және басқа да әлеуметтік осал топтарға ұсынылды.
«Коммуналдық инфрақұрылымның тозуы тарифтердің көтерілуін қажет етеді, бірақ әлеуметтік осал топтарға көмек көрсету әрқашан басты мақсатымыз болып есептеледі», — деді Алматы қаласының Жұмысқа орналастыру және әлеуметтік бағдарламалар басқармасының басшысы Бауыржан Жаубасов.
Әлеуметтік төлем алу үшін Алматыда тұрақты тіркеуде тұратын және қажетті құжаттарды ұсынған 9 әлеуметтік осал топтың өкілдері өтініш бере алады.
Бұған дейін бұл көмекті алған азаматтарға өтініш қайта берудің қажеті жоқ, олардың әлеуметтік көмегі онсызда ұзартылады.
