Алматы қаласының Жетісу ауданындағы Кемел шағынауданында жаңа көпір құрылысы аяқталып, 22 қараша күні қозғалысқа беріледі деп жоспарланып отыр. Бұл шешім ауа райы қолайлы болған жағдайда жүзеге асады. Бұған дейін ескі көпір апатты жағдайға байланысты жабылған еді.
Алматы қаласының әкімдігі хабарлағандай, 1960-жылдары салынған ескі көпір биыл маусым айында техникалық тексеруден өткен. Нәтижесінде бетон құрылымдардың жартылай бүлінгені, тіреулердегі жарықтар, деформациялық жіктің болмауы және басқа да ақаулар анықталды. Осыған орай, жаңа көпір салу туралы шешім қабылданған.
Алғашында көлік қатынасын қазан айының соңында ашу жоспарланған болатын. Алайда топырақ құрылымының ерекшелігіне байланысты 9 метрлік қадалар орнына 29 метрлік қадаларды орнату қажеттілігі туындады.
– – Құрылыс жұмыстарына дайындық кезінде өзен арнасындағы жаяу жүргіншілер өткелінің бір бөлігі құлап кетті. Бастапқыда бұл бөлік жаңа көпірдің құрылысы аяқталған соң ғана бұзылады деп жоспарланған. Алайда өткелдің күтпеген жерден құлауы оны мерзімінен бұрын бөлшектеуге мәжбүр етті. Бұл жағдай жұмыс кестесіне айтарлықтай әсер етті, – деп түсіндірді әкімдіктің баспасөз қызметі.
Бүгінде қадаларды орнату және сынақтан Бүгінде қадалар орнатылып, сынақтан өткізу, тіреуіштер мен бекіту қабырғаларын салу, инженерлік желілерді ауыстыру жұмыстары толығымен аяқталды. Көпір барлық қажетті сынақтардан сәтті өтті.
Жаңа көпірдің ұзындығы бұрынғы 16,8 метрден 33 метрге, ал ені 8,5 метрден 14,5 метрге дейін кеңейеді. Сонымен қатар, екі жағынан 1,5 метрлік жаяу жүргіншілер жолы салу жоспарланған.
Бұл көпірдің ашылуы Кемел шағынауданы тұрғындарының жүріп-тұруын едәуір жеңілдетіп, көлік қатынасын реттеуге ықпал етеді деп күтілуде.
Мақала авторы: Ермек Сериков
