Жетісу ауданы, Айнабұлақ мөлтек ауданында екі жыл бұрын басталған жылу желілерін қайта жаңарту жұмыстары аяқталды. «Алматы жылу жүйесі» ЖШС тапсырысымен жүзеге асқан бұл жоба аясында жылу жүйесінің жалпы ұзындығы 5865 метрді құрайды.
2022 жылы 1730 метр, 2023 жылы 2000 метр, ал 2024 жылы 2135 метр жылу желісі жаңартылды.
Ағымдағы жылы Мақатаев көшесі бойындағы ТМ-18 «Айнабұлақ» жылу магистралі бөлігі қайта жаңартылды (Жұмабаев көшесінен Павлодар көшесіне дейін). Негізгі құрылыс жұмыстары 2024-2025 жылдардың қысқы маусымына дейін аяқталды.
Қазіргі уақытта қайта жаңартылған жер нысанында жол жабынына майда топырақтан жасалған асфальт төселіп, кейінірек жол белгілері орнатылады.
Айта кетсек, бұл жылу магистралі 1981 жылы пайдалануға берілген, оның пайдалану мерзімі 43 жылды құраса, нормативтік пайдалану мерзімі 25 жыл болып табылады.
Жоба нәтижесінде 344 көпқабатты тұрғын үй, 11 мектеп, 3 денсаулық сақтау нысаны және тағы 483 басқа ғимарат сапалы жылумен қамтамасыз етіледі.
Биыл Алматы әкімі Ерболат Досаевтың тапсырмасымен қалада 20 км жылу желісі қайта жаңартылды, жұмыстар 6 ауданның аумағында жылу маусымы басталғанға дейін жүргізілді. Қайта жаңарту жұмыстары аяқталған соң, учаскелерді абаттандыру кезең-кезеңімен, ауа райына байланысты жүзеге асырылады.
