ҚР ұлттық экономика вице-министрі, Арман Қасенов 2024 жылдың 10 қазанында Сенат жиналысында Қазақстандағы атом электр станциясын салуға арналған қаржы көздері туралы айтты.
Спикер АЭС-ті кім салатыны әлі белгісіз екенін атап өтті.
«Осыған байланысты, АЭС құрылысын қаржыландыру жайлы нақты ақпарат жоқ. Құрылыс шығындарын бөліп төлеу нұсқасы да қарастырылады. Құрылыс жүргізетін компания төлемді кейінге қалдыру мүмкіндігін ұсынбақ. Сондықтан да қаржы қажеттілігі туындамау тиіс. Дегенмен, АЭС-ті кімнің салатыны белгісіз болғандықтан, бұл туралы нақты жауап беру қиынға соғады», — деді Арман Қасенов.
Сонымен қатар, вице-министр АЭС құрылысының шығыны туралы сұрақтарға жауап берді.
«Тарифтерге байланысты жобаның шығынды болуы мүмкін емес. Барлық энергетикалық жобалардың шығындары болатыны анық және олар бағалардың құрамына кіреді» — деп, Арман Қасенов өз пікірін білдірді .
2024 жылдың 8 қазанында Орталық сайлау комиссиясы АЭС құрылысын қолдаған Қазақстан азаматтарының референдумдағы дауыс беру нәтижелерін жариялады. Мекеме мәліметіне сәйкес, 5,5 миллионнан астам қазақстандық аталмыш станцияның құрылысын қолдаған.
