Су тасқынына ұшыраған аймақтардың тұрғындары әкімдермен кездесулер мен тікелей эфирлерде бөгеттердің тағдыры жөнінде бірнеше рет сұрақтар қойды. Алайда, аталмыш жұмыстардың басталуына бәрі бірдей қуанышты емес екені анықталды. Бұл аптада Петропавл қаласының саяжай тұрғындары Тепличное ауылын қорғау үшін салынып жатқан бөгетке қатысты жергілікті биліктің саяжай қауымдастықтарын ескермеуіне наразылық білдірді.
Облыс әкімі Гауез Нурмухамбетов әлеуметтік желілерде су тасқынынан зардап шеккен қорғаныс құрылымдарын қалпына келтіру жұмыстары басталғанын хабарлады.
«Жол картасы қабылданып, қаржы бөлінді, мердігерлер анықталды. Қазір Кожевенный және Заречный ауылдарындағы, Ущева көшесіндегі және Подгорное ауылында 0,8 км-лік бөгеттердің құрылысы жүріп жатыр. Прибрежное, Бескөл және Тепличное ауылдарында да жұмыстар атқарылуда. Сонымен қатар, су қоймасының айналасындағы бөгет күшейтіледі, Жеңіс паркінде ашық жаңбыр суын жинау жүйесі орнатылады, жағалауды нығайту жұмыстары жүргізіледі», – деді Солтүстік Қазақстан облысының әкімі.
Оның айтуынша, бөгеттерді нығайту жұмыстары мамандардың есептеулері мен Есіл өзеніндегі судың деңгейін ескере отырып жүргізуде.
«Биылғы жылы болған су тасқынының барлық ерекшеліктері ескеріледі. Барлық жұмыстар екі ай ішінде аяқталады. Мен қорғаныс құрылымдарын қалпына келтіру жұмыстарын жеке бақылауда ұстаймын», – деп атап өтті облыс әкімі.
